Ö-3-3 (Otres tres)

Ya ta na cai el discu Ö-3-3 (Otres tres) de La Tarrancha. Anque ya teníen asoleyaos dellos trabayos como la maqueta Qlt? (culete?) y la participación en dellos compilatorios y tributos, ésti ye’l discu primeru de llarga duración de la banda. Autoproducíu pol grupu y el sellu Algamar Producciones, el discu foi grabáu en Tutu Estudiu por Sergio Rodriguez  nel pasáu mes d’ochobre. Trátase d’un discu orixinal, con un soniu totalmente personal, propiu, pero totalmente eclépticu.  La base del soniu de La Tarrancha ye’l Ska y el Reggae, pero dando-y pincelaes que van dende’l funk al swing, dende’l ragga al folk, de la pachanga a la música tradicional de… Eso si too ello con un carcteristicu sonío llimpiu, enllenu de pequeños matices pero llimpiu y alloñau de distorsiones y dureces acustiques. Too ésto ye lo qu’ellos autodefinen al so propiu estilu como “Mecigayu Ska”. La temática de les lletres  ye bariada; diendo dende l’amor, a la reivindicación; de la critica, al cachondeo; de la muerte, a la vida y del mundu, al chigre. Tolos cantares son n’asturianu, menos una d’elles que ta na fala del la zona Navia-Eo o gallegoasturianu.

Dempues d’estos años d’esistencia y de munchos cambios na formación, La Tarrancha muestrá n’esti discu el resultáu final y esperemos qu’estable de lo que va ser el so soníu apartir d’agora. Non mui distintu del d’enantes pero nel qu’a la escontra qu’antes, onde teníen un pesu importante los metales, agora, cobren un especial protagonismu l’acurdión diatonioca, el trombón y les flautes, acompañando a les guitarres, baxu, percusiones latines y africanes, bateria y voz.

El grupu nun comparte l’actual política de la SGAE, a la que consideren meramente recaudatoria, abúsiba y que va a la escontra de los pequeños grupos y de la xente que realmente vive la música como daqué mas que mercantil, si non cultural, dándose casos d’entamar pleitos y torgar conciertos autoxestionáos por colectivos, sociedaes de festeyos o pequeñes sales, creando un estau de miéu nel que cada vez s’entamen menos conciertos pequeños onde los grupos puean desarrollar la so creatividá. Y ye por ello que dende un principiu apuesten por otru tipu de llicencies, Ö-3-3 tien llicencia Creative Commons y dientro poco va tar disponible na rede, pa que tol mundu puea descargalu llibremente ensin qu’eso conllebe nengun delitu.

El porque de Ö-3-3. (Un apunte interesante)

Va ya unos cuantos años… n’algún requexu perdiu de Euskadi… ente los borrosos años 94 y 96, un fururu integrante de La Tarrancha pegaba blincos nun conciertu. Al acabar l’actuación tola xente glayaba “beste bat!!, beste bat!!!, beste bat!!!” glayiu qu’afalagaba al grupu a tocar una más, y que si lu ponemos tal como se recita ye: bes-te bat! bes-te bat!. Usando el mesmu ritmu y a la par, empecipió a sintise en tonu de chancia y cachondeo una frase que nun yera n’euskera, non. Yera un xuegu de palabres que los vascos nun pillaben, yera la primer vez que nun conciertu se dicia “o tres tres!! otres tres!!!” O lo que ye lo mesmo Otres tres!!! (o les que cuadren). Col pasu del tiempu eso convirtiose nun chiste pribau, un glayiu de cuatro alloriaos que diben de nuechi celta en nuechi celta y de conciertu cañeru en conciertu cañeru. Lo memso que lo de “soltai a Barrabas!!” (de la Biblia) o’l mas llográu “soltai a Roderik!! (de los Monty Piton), la frase de marres foi pegandose nos garguelos de la xente. Hasta’l dia de güei, onde’l gritu de guerra gláyase tanto nun conciertu de Dixebra, como n’un de la Pantoja, lo memso n’Asturies como nos paises vecinos.

Ö-3-3, pretende ser eso, un toque d’humor y un recuerdu de tolos conciertos onde quedemos cortos por nun tocar mas. Ye un convite a la música en vivo, ye un convite a los que disfrutamos pengando brincos nos conciertos y ye un convite a qu’esti discu sepiavos a poco y mos pidais…. Ö-3-3!!! Ö-3-3!!! Ö-3-3!!! Ö-3-3!!!!